ДУНЁ ФУТБОЛИ ВА ФУТБОЛ ДУНЁСИ

Одил Аҳмедов Намангандаги футбол мактабига сунъий майдон қуриб беради

IBRAT — Fri, 13 Apr 2012 11:12:25 GMT

Яқинда "Чемпион" газетаси ходимлари Наманган футболи билан яқиндан танишиш мақсадида вилоятга сафар уюштирдилар. Сафар давомида Наманган шаҳридаги 15-сон футбол бўйича давлат ихтисослаштирилган мактаб-интернатидан ҳам репортаж тайёрланди.

Эслатиб ўтамиз, ушбу мактабдан бугунги кунда ўзбек футболи фахрига айланиб бораётган Одил Аҳмедов етишиб чиққан.

"Бизнинг мактабимиздан бир қатор таниқли футболчилар етишиб чиққанлар. Албатта уларнинг орасида Одил Аҳмедов бошқача ўринга эга.

Яқинда Одил мактабимизга ташриф буюрди ва болалар билан учрашиб, улар билан суҳбатлашди. Шогирдимиз футбол мактабининг ривожи учун ўз ҳиссасини қўшишни ният қилган. Мактабимиз учун "Болалар спорт жамғармаси" томонидан бунёд этилган база яқинидан сунъий майсали майдон қуриб беришини айтиб ўтди.

Умид қиламиз, бундай майдонда тўп сурадиган ёшларимиз орасидан яна шундай иқтидор эгалари етишиб чиқадилар", дейди мактаб интернат раҳбари.

Эслатиб ўтамиз, "Чемпион" газетасининг янги сонида вилоятга уюштирилган сафар билан боғлиқ барча тафсилотлардан бохабар бўлишингиз мумкин. Наманган футболида содир бўлаётган ўзгаришлар, ўйингоҳ, "Навбаҳор" клуби ва вилоятдаги болалар футболи ҳақидаги маълумотлар газетанинг янги сонидан ўрин олган.

Шунингдек футбол мактабига сунъий майдон қуриб бериш учун қанча ҳаражат талаб қилиниши ҳам ушбу мақолада келтириб ўтилган.

«Пахткор» 2012 йилги машғулотлар бошлаб юборди

IBRAT — Thu, 05 Jan 2012 09:56:05 GMT

"Пахтакор" клуби расмий сайтининг хабарига кўра, кеча жамоа биринчи хориж йиғинини ўтказиш мақсадида Туркиянинг Анталия шаҳрига учиб келган.

Шу куннинг ўзидаёқ биринчи машғулот ўтказилди. "Рексиос" меҳмонхонасига жойлашган пахтакорчилар шу меҳмонхонанинг 5 юлдузли майдонида машғулот олиб бордилар. Бош мураббий ҳам айнан Анталияда жамоамиз сафига келиб қўшилди. Соат 15:00да меҳмонхонага етиб борган жамоанинг мураббийлар штаби янги мураббийи билан йиғин доирасида қилинадиган ишлар бўйича келишиб олдилар.

"Мен бу ерда янгиман, шунинг учун сизларнинг кўмагингизга муҳтожман. Ўйлайманки, бир оила бўлиб ўз олдимизга қўйилган мақсадларимизга эришамиз" - дейди болқонлик мураббий мураббийлар штабига.

Тошкент вақти билан соат 19:00да биринчи машғулот бўлиб ўтди. Дастлабки машғулотдаёқ янги мураббий футболчиларни тўп билан ишлатди. Машғулотларда барча футболчилар иштирок этдилар. Илҳом Суюнов, Боян Миладинович ва Владимир Козак жароҳатлари туфайлигина биринчи хориж сафарига бора олмаганлар. Тунда Санибал Ораховиц ҳам шерлар сафига келиб қўшилди. У бугун бўлиб ўтадиган машғулотларда иштирок этади.

"Мен бугун илк маротаба футболчилар билан машғулот олиб бордим. Бошланишига ёмон эмас. Биринчи йиғинга кўплаб футболчиларимиз етиб кела олишмади. Баъзилари терма жамоа ихтиёрида бўлсалар, айримлари жароҳат олган эканлар. Шунинг учун ҳозирча бор имкониятдан фойдаланиб турамиз" - дейди жамоанинг бош мураббийи машғулот якунига етгач.

Манба: www.pakhtakor.uz

Чосон истилоси

IBRAT_KING — Tue, 11 Oct 2011 12:13:54 GMT

1432 ҳижрий йил Зулқаъда ойида Вадим Абрам бошлиқ ўзбек лашкари Чосон (Шимолий Қурия) сари юриш уюштириб, ўн учинчи сананинг эрта тонгида жанг бўлиб ўтадиган манзил яқинидаги музофотга эсон-омон етиб келишди.

Саркарда лашкарга бир оз ҳордиқ чиқариб олиш учун имкон берди. Бугун қуёш қоқ тиккага келиб, пурвиқор тоғлар ортига оғишни бошлаган бир пайтда, «Янг Гак До» аталмиш майдон сатҳида кўзи қисиқ қуриялик ёғийларга қарши аёвсиз жанг бўлиб ўтиши кутилмоқда. Бугунги тўқнашувнинг қиймати жуда юқори. Уммон ортидаги Бразил деб аталмиш ўлкани фатҳ этиш йўлида бугун Чосонни истило қилиб, Ватанга музаффар ҳолда қайтмоқ лозим.

Саркарда Вадим Абрам жанг учун ўзига хос услублар ўйлаб топиб, рақибни доғда қолдириш учун туну кун тайёргарлик кўрганига шубҳа йўқ. Лашкар ҳам шунга яраша жанговар ҳолда тўқнашувга шай бўлиб турибди.

Қўшиннинг олд тарафида аййёрлиги-ю устомонлиги билан ном чиқарган Гейнрих рақиб ҳимоясини ёриб ўтишга ҳаракат қилади. Ундан орқароқда моҳир жангчи Сервер бошчилиғидаги Темур, Азиз, Одилбеклардан ташкил топган камончилар гуруҳи ёғий аскарларини майдоннинг у тарафиға ўтказмаслик учун шай бўлиб туришади. Буронғордан Санжар, жувонғордан Жасур рақиб аскарларининг кўзини очирмай, Шайбонийхондан мерос қолмиш "тўлғама” услубида ҳужум уюштириб, қанотлардан рақиб ҳимоясини бузишға интиладилар. Ҳимоямиз қўрғонида Ислом, Виталий, Виктор номли матонатли аскарларимиз бутун «жанг» давомида «сўнгги томчи терлари» қолгунча юрт шаънини ҳимоя қилиб, рақиб ҳужумларини бирма-бир қайтариб турадилар. "Қароргоҳ” йўлидаги сўнгги маррани Игнатдек маҳоратли посбонимиз қўриқлайди. Қўриқлаганда ҳам бутун жону жаҳонини тикиб қўриқлайди. Зеро унинг ортида бошқа ҳеч ким йўқ.

Лашкарбоши Вадим Абрам майдон ёқасидан туриб, жангни бошқариб туради. Ватан учун, юрт шаъни учун майдонға чиқадиган лашкар ғалабаси учун юртда қолиб, бир тану бир жон бўлиб дуога қўл очиб турган эл-улус ҳурмати бугун зафарга эришиш зарур.

Олға ўзбек лашкари!

Манба: http://uff.uz

Хайр Торреон, салом Монтеррей!

IBRAT_KING — Fri, 01 Jul 2011 13:25:27 GMT

Ўзбекистон ўсмирлар терма жамоасининг бугунги куни Мексиканинг икки шаҳрида ўтди. Қуёшни иссиқ Торреонда кутиб олган Жаҳон чемпионати чорак финалчилари кунни Мексиканинг энг йирик шаҳарларидан бири ҳисобланган Монтеррейда якунлашди.

Торреондаги Crowne Plaza Holiday Inn меҳмонхонасида эрталабки нонуштани тановвул қилган футболчилар ўз буюмларини йиғиштириб, Монтеррей сафарига тайёргарлик кўрдилар. Кимдир тайёргарликни кеча кечқурун қилиб қўйган бўлса, яна кимдир Торреондан кетгиси келмади, шекилли, бугун эрталаб нарсаларини йиғиштирди. Камина ҳам ана шу иккинчи тоифадагиларга кираман. Монтеррей қанақа шаҳар экан деган ҳис-туйғу ичимда бўлса-да, мусофирликнинг 20 куни ўтган Торреондан ҳечам кетгим келмади.

Бу шаҳарни биз ҳали жуда кўп эслаймиз. Ажойиб хотиралар ва соғинч билан ёдга оламиз. Зеро, мана шу шаҳарда Ўзбекистон ўсмирлар терма жамоаси Жаҳон чемпионати баҳсларини муваффақиятли ўтказиб, дунёнинг энг кучли 8 та жамоаси сафига кирди. Ўзбекистон мамлакатини билиш тугул, уни ўз тилида талаффуз қила олмайдиган мексикаликлар "Ўз-бе-кис-тон” деб стадион узра қўшиқ куйлайдиган даражада ўзбекистонликларни севиб қолди.

Торреон аеропортига 10:30да келдик. ФИФА бизнинг жамоа учун миттигина самолёт ва чартер рейсини тайёрлаб қўйганди. 11:00да учадиган самолёт бор-йўғи 40 дақиқа ўтиб Монтеррейга қўнди. Шаҳарда ҳаво булут, ёмғир томчиларди. Ёмғирни соғинган Торреондан ёмғирдан безган Монтеррейга келиб, Мексикада ҳам яшил дарахтлар ўсишининг гувоҳи бўлишди йигитлар. Чунки, терма жамоа Мексикада фақат Торреонда истиқомат қилди ва бу шаҳар Мексиканинг чўл зонасидир.

Монтеррей аеропорти шаҳар ташқарисида жойлашган бўлиб, мамлакатнинг энг катта аэропортларидан бири ҳисобланади. Аеропортда бизнинг делегацияни маҳаллий ташкилий қўмита аъзолари кутиб олишди.

Шаҳар марказида жойлашган Президент Интерконтинентал меҳмонхонасининг 6-қаватига жойлашдик. Ҳали томчилаётган ёмғир кучайгандан кучайди. Қуёшдан дарак йўқ. Меҳмонхона деразаларига урилиб ёғаётган ёмғир кечгача тўхтамади.

Торреонга қиёсласак, Монтеррей пойтахт шаҳарларга ўхшаб кетадиган замонавий кўринишга эга. Торреонда энг баланд бино бизнинг автобус бўлган бўлса, Монтеррейда яшил дарахтлар, манзарали жойлар ва гуркираб кўкариб турган палмалар ва баланд бинолар кўзни яшнатади. Шунга қарамай, Торреонни соғинишга улгурди инсон. Тез орада у ердан фан-клуб аъзолари Монтеррейга етиб келишади. Уларга Ўзбекистон терма жамоаси раҳбарияти ФИФА тақдим этган чипталарни улашади.

Монтеррейдаги меҳмонхонага жойлашган футболчилар тушлик қилиб, ўз хоналарига жойлашдилар ва бироз дам олишди. 17:00да сув ҳавзасида тикланиш машқлари бажарилиб, тренажёр залида жисмоний тайёргарликлар бўйича мураббий Муродбек Исмоилов ҳамда катта мураббий Аҳмаджон Мусаев захирада ўтирган футболчилар билан алоҳида ишлади.

Австралияга қарши ўйинда майдонни эрта тарк этган Бобур Давлатовнинг соғлиғи жойида. У оёғида деярли оғриқ сезмаяпти. Жамоа шифокори Рустам Меҳмоновнинг сўзларига кўра, оёқнинг айрим мушаклари лат еган ва футболчи Уругвайга қарши ўйингача сафга қайтиши кутилмоқда.

Бундан ташқари, оёғи бироз қайрилиб кетган Аббос Махсталиевнинг ҳам саломатлиги яхши. Эртага жамоа сардори худди бугун бўлгани каби машғулотларда тўла иштирок этади.

Бу орада Уругвай терма жамоаси ҳам Монтеррейга етиб келди. Мен билан саломлашган жамоа таржимони Ўзбекистон терма жамоасини ғалабалар билан табриклаб, жамоани турнирда Япония каби чиройли ўйин кўрсатаётган кам сонли терма жамоалардан бири дея эътироф этди.

Эртага 1 июль куни терма жамоа аъзолари эрталаб яна сув ҳавзаси ва тренажёр залида шуғулланишса, тушликдан сўнг, ФИФА машғулотлар майдонида Уругвайга қарши ўйин олдидан биринчи машғулотлар бошланади.

2 июль куни эса, ФИФА делегацияси истиқомат қилаётган Камино Реаль Монтеррей меҳмонхонасида икки терма жамоа иштирокида йиғилиш бўлиб ўтади. Шу куннинг ўзида Ўзбекистон ўсмирлар терма жамоаси Монтеррейдаги стадионда ўйин-олди расмий машғулотларини ўтказиб, матбуот-конференциясида журналистларнинг саволларига жавоб қайтарди.

Турнир сеткасига кўра, чорак финалда Уругвай термаси рамзий маънода майдон эгаси сифатида ўйнайди. Ўзбекистон мазкур ўйинни иккинчи либоси ҳисобланган кўк рангли либосда ўтказиши кутилмоқда.

Санжарбек РИЗАЕВ
ЎФФ матбуот котиби
Монтеррей, Мексика
Манба: www.uff.uz

Торреондаги сўнгги кун

IBRAT_KING — Thu, 30 Jun 2011 13:47:59 GMT

Насиб этди. Бугун 29 июн куни эрталаб делегациянинг барча аъзолари бирин-кетин каминани ва Холмуродовни таваллуд айёми билан табриклашди. Crowne Plaza Holiday Inn Torreon меҳмонхонаси ходимлари ҳам чироқларни ўчириб, мен ва Холмуродовга атаб тайёрланган оппоққина тортни олиб киришди. Шамлар ўчгач, ҳамма қарсаклар билан бизни табриклади. Кун ана шундай яхши кайфият билан бошланди.

Аббосбек Махсталиев табриклаш маросими тугаганидан сўнг, менга "яхшилаб табрикламади, деб ўйлаб юрманг яна, сизга алоҳида табригим бор” деб айтди. Мен дарҳол у бугун гол урса уни бизга бағишлашига шаъма қилаётганини сездим. Унинг гол уришига ишондим. Нега дейсизми?

АҚШга қарши ўйиндан сўнг, Аббосбекнинг хонадоши Равшанбек Ҳайдаров жиддий жароҳат олганди. Бу иқтидорли ҳимоячининг оёқлари Ўзбекистон учун синди. Гипс солингач, Ҳайдаров турнирда бошқа ўйнай олмаслигини билиб, сиқилди, кўзига ёш келди. Буларнинг барини у билан битта хонада яшаб келган Аббосбек Махсталиев кўрарди. Жамоа сардори Ҳайдаровнинг бу ҳолини кўриб қийналарди, аммо начора?

Чехия терма жамоаси дарвозасига киритилган иккинчи голдан сўнг, Махсталиев бошқа жамоадошларидан четроққа ўтиб туришини сўраб, тўғри Ҳайдаровнинг олдига келган ва голни унинг ватан учун синган оёқларига бағишлаганди. Ўйиндан кейин суҳбатлашганимизда, "Равшаннинг жуда хафа бўлганлигини кўриб, унинг кўнглини кўтаргим келди. Гол ураман ва бугун уни ҳурсанд қиламан деб кўнглимга тугиб қўйгандим. Қаранг, яхши ният қилиб бир нарсани ўйлаб қўйсангиз, амалга ошар экан, Санжар ака”деб айтганди.

Бу сафар ҳам бугун алоҳида табриклайман деган Махсталиевга мен ич-ичимдан ишондим. У ҳақиқий сардор, ҳақиқий етакчи, жамоа «мотор»и ва «энерджайзер»и. Ваъдасининг устида чиқадиган ўзбекнинг мард йигити. Айтганини қилди.

Австралия терма жамоасига чиройли гол уриб бергани етмагандек, 3 нафар жамоадошини ортидан эргаштириб, тўғри менинг олдимга келди ва туғилган куним билан табриклади. Томоғим ачишиб кетди. Хурсандлигимдан. Бу туғилган куним учун энг яхши совғалиги ўз йўлига, аммо жамоа сардорининг катталар ақли етмайдиган нарсаларда жуда ўткир эканлиги ва жамоанинг ҳар бир аъзосига меҳри, эътибори баландлигини кўриб, шляпамни ечдим унинг қаршисида. Ўрганинг! Қараганимча ўйладим: "Унинг каби укам бўлишини ҳоҳлардим”.

11-дақиқада урилган мазкур гол ўзаги бақувват Ўзбекистон ўсмирлар терма жамоасининг кучига куч қўшди. Ҳужумлар хавфли тус олди. Қарши ҳужумда иштирок этган Австралия терма жамоаси аъзолари ўзбекистонлик энг ёш футболчи Бобур Давлатовни тўхтатиб қолишди. Давлатов оёғидан енгил жароҳат олди ва майдонни тарк этди. Унинг ўрнига Давлатбек Ёрбеков майдонга туширилди. Кийиниш хонасига чиқиб кетиш олдидан маҳаллий аҳолининг эркатой ўғлонига айланиб улгурган Тимур Ҳакимов ҳам гол урди. 2:0!
Танаффус вақтида футболчилар кийиниш хонасида бироз тин олишга муваффақ бўлдилар. Бош мураббий ва унинг ёрдамчилари футболчиларга иккинчи бўлимда нималар қилиш кераклигини, ўзига керагидан ортиқ ишониб юбормаслик зарурлигини уқтиришди.

2х2=4 кўринишида якунига етган ўйиннинг 2 бўлими ҳам 2 та гол билан безалди. Аввалига, Давлатбек Ёрбеков туғилган кунини нишонлаётган Холмурод Холмуродовга гол уриш имкониятини яратиб бериш учун тўпни етказиб беришга ҳаракат қилди. Шу куни гол уришни хоҳлаган Холмуродовга Коннор Чапман ҳалақит берди. Унинг автоголи амалда Ўзбекистон терма жамоасини дунёнинг энг кучли 8 жамоасидан бирига айлантирди.

Ўйин охирларида, Давлатбек Ёрбековнинг ўзи муваффақият қозонди. Аҳмаджон Мусаев ва Муродбек Исмоиловларнинг машғулотлари чоғида тузиб чиқилган комбинация Жасур Ҳакимов, Тимур Ҳакимов ижросида жуда чиройли бажарилди. «Сариқ» Ҳакимов тўпни Ёрбековга идеал тарзда етказиб берди. Фарғоналик ярим ҳимоячи ҳам муғомбирона зарба билан орадаги фарқни 4 тага оширди.

Ҳакам ҳуштаги чалиниб бўлгандан сўнг, ҳамма бир-бирини табриклади. Ғалаба билан муборакбод этди. Таваллуд айёмининг бундай нишонланишига нафақат ўзимизникилар, балки Австралияликлар ҳам автогол билан ёрдамлашиб юборишди. Бунинг учун алоҳида ташаккур айтиб, Австралияга Ўзбекистон миллий терма жамоаси Осиё Кубогида Австралияга 6:0 ҳисобида тасодифан ютқизганлигини исботлаб беришга ҳам ҳаракат қилдик, шекилли. Аммо, 6:0 учун реванш олиш ният йўқ эди. Чунки, Австралия терма жамоаси ва Австралия Футбол Федерацияси билан Ўзбекистоннинг алоқалари жуда яхши ва самимий.

Турнирда Осиё жамоаларининг ўйинларини ҳам бевосита кузатаётган Ўзбекистон терма жамоаси қитъадошларини қўллаб-қувватламоқда. Австралиянинг ўйинларидан сўнг, Ўзбекистон терма жамоаси бош мураббийи Алексей Евстафеев ФИФАнинг бош координатори австралиялик Гари Мореттидан Австралия терма жамоасига алоҳида саломларни етказиб қўйишни сўраганди. Австралия терма жамоаси ҳам жавоб тариқасида ёзилган электрон мактубда Ўзбекистон терма жамоасига омад тилашини айтиб ўтганди. У вақтда бизга Австралия рақиб бўлишини ҳеч ким билмасди.

Ҳар бир учрашувдан сўнг, ФИФА терма жамоаларга ўзи иштирокидаги ҳамда бўлажак рақибининг DVD дискини бериши керак. Бу регламент билан тасдиқлаб қўйилган бўлсада, ФИФА негадир бизга 29 июн куни эрталаб ҳам дискни келтириб беролмади. ФИФА ҳижолат чекар, биздан дискни Австралия терма жамоасининг ўзидан олишимиз мумкинлигини айтиб вазиятни юмшатишга уринарди.

Ие, Австралия биз билан нимчорак финалда ўйнаса, нима рақибига DVD дискни берадими?
Берди! Австралия FIFA FAIR PLAY қоидаларига амал қилган ҳолда Ўзбекистон терма жамоаси делегациясига ўзи иштирокидаги, яна биз ФИФАдан талаб қилган Австралия-Бразилия учрашувини берди. ФИФА эплай олмаган ишни қилди. Балки, мағлубиятда шу олиш-беришнинг ҳам таъсири бордир, аммо мен мана шундай профессионал муносабати учун Австралияга ўрнимдан туриб алоҳида қарсак чалган бўлардим. Улар ҳатто ўйиндан сўнг, Ўзбекистон терма жамоасининг кийиниш хонасига кириб, бизни ғалаба билан табриклашди ҳам.
Учрашувдан сўнг бўлиб ўтган матбуот анжуманида Ўзбекистон терма жамоаси бош мураббийи Алексей Евстафеев Австралия терма жамоасининг муаммоларидан бирини ўйинга тайёргарлик кўриш учун етарлича вақтга эга бўлмаганлиги билан изоҳлади.
"Мен мураббий сифатида австралиялик ҳамкасбимни тўлиқ тушунаман. Аммо, нима ҳам қилардик, бу ҳам футболнинг бир қисми. Аммо, Ўзбекистон фақатгина шу сабабгина ғалаба қозонди деб айтмаган бўлардим. Биз ўйинга муносиб тайёргарлик кўрдик. Алоҳида Австраля учун дастур тузилмади. Биз одатдаги ўйинлардан бирига тайёргарлик кўргандек машғулотлар ўтказдик ва ғалаба қозондик. Бугун Ўзбекистон аҳолиси учун ҳақиқий байрамлигини ҳис қилиб турибман, бундан ташқари Торреон шаҳри аҳли ҳам бу ғалабани нишонлашга ҳақли деб ўйлайман. Чунки, улар ақлга сиғмайдиган даражадаги ишқибозлик маданиятини кўрсатиб, бизни лол қолдиришди. Умид қиламанки, бугунги урилган голлар уларни ҳам хурсанд қилди”, - дейди Евстафеев.

Чорак финалда Ўзбекистон ўсмирлари Конго терма жамоасини 2:1 ҳисобида мағлубиятга учратган Уругвай билан беллашади.
"Биз бу икки жамоанинг ўйинини бугун телевидение орқали томоша қиламиз. Ундан сўнг, DVD орқали ўйинларни таҳлил қилиб, рақибни ўрганамиз”, - дейди Евстафеев.

Мазкур учрашув Ўзбекистон терма жамоасининг Торреондаги сўнгги ўйини ҳисобланади. Маҳаллий журналистлардан бири Мерседес Моралеснинг сўзларига кўра, Ўзбекистон Торреондан кетиб, ўзи билан шу замин тупроғини ҳам олиб кетаяпти.

"Албатта, Торреондан кетгимиз келмаяпти, аммо бошқа илож ҳам йўқ. Бизга бу шаҳарнинг ўзи, инсонлари, ишқибозлари ва хатто шу ерда меҳнат қилган журналистлари ҳам очиқ, самимий, дўстона муносабатда бўлишди. Аммо, билишимча биз билан Монтеррейга бу ердаги ишқибозларимиз ҳам боришар экан. Умид қиламанки, уларнинг ёрдами билан Монтеррейдаги ишқибозларнинг ҳам меҳрини қозонамиз”, — дейди 43 ёшли Евстафеев.

Эслатиб ўтамиз, Ўзбекистон терма жамоаси эртага 30 июн куни маҳаллий вақт билан соат 11:00 да чартер рейс билан Торреондан Монтеррейга учиб кетади. Сал олдин Монтеррейдаги маҳаллий ташкилий қўмита аъзолари Ўзбекистон терма жамоасининг кун тартибини сўраб, маълумот юборишимизни илтимос қилди.

Монтеррейгача 1 соат училади ва ушбу шаҳарда Уругвай терма жамоасига қарши чорак финал учрашуви ўтказилади. Ҳайдаровнинг жароҳат олиб, турнир оҳиригача сафдан айрилганлигини инобатга олмасак, йўқотишлар йўқ. Ҳозирча, жароҳат олган Бобур Давлатовнинг аҳволи бироз қоронғу. Футболчи ҳали ҳам оёғида оғриқ ҳис қилаяпти. Эртага футболчи Монтеррейдаги шифокор кўригида бўлиб қайтгач, бирор бир қарорга келиш мумкин.

Бундан ташқари, Уругвайга қарши ўйинда гуруҳ ва нимчорак финал босқичларида олинган сариқ карточкалар ҳам куйиб кетади. Демак, Уругвайга қарши ўйинда, футболчилар "тоза” бўлиб тушишади.

Кундаликни биз Австралияга қарши ўйиндан кейинги ҳаяжонли байрам ёзилган видеоролик билан якунлаймиз. Видеороликда ғалаба қандай нишонлаганлиги ҳақида тўлиқ ёзилган. Навбатдаги кундалик эса, Монтеррейдан бўлади.

Видеони ҚУЙИДАГИ ҲАВОЛА орқали томоша қилишингиз мумкин.

Манба: www.the-uff.com

Иккинчи босқич сари

IBRAT_KING — Wed, 29 Jun 2011 13:52:37 GMT

Ош! Футболчиларнинг Ўзбекистон билан боғлиқ соғинчи ҳам ана шу таом билан боғлиқ. Ошни ҳар куни қилишмайди. Ўзбекистоннинг фахри ҳисобланган ушбу таом ҳафтада бир ёки бирор-бир байрам туфайли тайёрланади. Палов агарда кўплашиб, дўстлар ёки ҳамскаблар билан, бундан ташқари қозон топилмайдиган мамлакатда тайёрланса, янада мазали. Баданингиз яйрайди. Чехия терма жамоасига қарши ўйиндаги ғалаба ва кейинги босқич йўлланмаси палов билан нишонланди. Ғалаба қўлга киритилган куннинг эртасига 6 кило ош дамланди. Торреондаги Ўзбекистон делегацияси таркибига келиб қўшилган Ўзбекистон болалар спортини ривожлантириш жамғармаси раиси Абдулла Ачилов ва жисмоний тайёргарликлар бўйича мураббий Муродбек Исмоиловлар Мексиканинг чўл зонаси ҳисобланган ўлкада ош дамлашди. ЧЕХИЯ БИЛАН ЎЙИН: БИРИНЧИ БЎЛИМ Чехия терма жамоасига қарши ўйин олдидан бош мураббий Алексей Евстафеев йигитларга ҳамма гап бунгача айтиб бўлинганини, фақатгина майдонга тушиб футбол ўйнаш қолганлигини айтиб ўтган эди. Футболчилар майдонга чиқиб келишаётганида Торреондаги Ўзбекистон фан клуби уларни ҳайқириқлар билан кутиб олишди. Кўпчилик стадион тенг иккига бўлинади, Ўзбекистон ва Чехия Торреонда ишқибозлари энг кўп терма жамоалардир, деб айтганди. Аммо икки жамоа чиқиб келганда стадионнинг аксарият қисми байроқлар билан Ўзбекистонни қўллаб-қувватлар эди. Ўзбек тилидаги сўзлар билан. Уларнинг бақирув-чақирувлари биз ўтирган захира ўриндиғига шундоққина эшитилиб турарди. Ўнг томонимиздаги трибуналарда дўппиларни кийиб, юзларига Ўзбекистон байроғини чизиб олган бу самимий торреонликлар чипта сотиб олаётган вақтда жамоага ҳам қалбан, ҳам масофа нуқтаи-назаридан яқин бўлишни истагандилар.

Ўйин олдидан биз рамзий маънодаги меҳмон жамоа сифатида, Чехия терма жамоаси ўтирган захира ўриндиғига бориб, футболчилар ва мураббийлар билан қўл сиқишиб уларга омад тиладик. Алексей Евстафеев бош мураббийнинг олдига келганида ўзининг шахсий совғасини тақдим этиб, бу махсус унинг учун эканини айтиб ўтди. Чехия терма жамоаси бош мураббийи совға тайёрлаб қўймаганлиги учунми, ўзини ноқулай сезди, шекилли, "қарз қилиб қўйдингиз, мени”, деди. Ҳозиржавоб Евстафеев ҳам бўш келмади: "Қарзингдан қутулмоқчи бўлсанг, бер бизга 3 очкони!”

"Аббос!” Келинлар қўзғолони филмида Аббоснинг отаси хонтахтанинг устига қўлини муш қилиб уриб, овозининг борича шундай бақиради. Чехияга қарши ўйинда "Аббос”нинг ролини ҳаётда ҳам шу исм билан маълум Аббос Махсталиев ўйнади. Мураббийлар эса, ўша таниш филмдагидек "Аббос!” деб бақириб, футболчини ўзларига қаратишар ва унга майдондаги кейин ўйин учун кўрсатмалар беришарди.

Ҳис қилганимни айтаман. Бу ўйинда камина худди АҚШга қарши ўйиндагидек қон босимига сабаб бўладиган хавотир ва ҳаяжон билан ўтирмадим. Йигитларга бўлган ишонч кучли эди. Майли, чехлар пенальтидан ҳисобни очган бўлишса ҳам. Мен, мисоли осмонда қора булутни кўриб, ундан кейин ёмғир ёғиши мумкинлигини тахмин қилган инсон каби яхши ўйнаётган жамоамизнинг бу вазиятдан чиқиб кетишига ишонган эдим.

Кейин бир нарсага эътиборни қаратдим. Торреонга мослашиш жараёни анча яхши кечганга ўхшайди. Ўзим мисолимда демоқчиман. Аввалига, захира ўриндиғида роса сув ичардик. АҚШга қарши ўйинда узоғи билан ярим литр сув ичдим. Балки 18:00 да бошлангани учундир, Чехияга қарши учрашувда чанқаганим учун сув ичмадим. Хавфли вазиятлардагина бир нима билан чалғиш учун сув ичганимни эслай оламан.

Захира ўриндиғининг энг файзли томони шундаки, бу ерда ўтирганларнинг бари ҳар бир футболчининг у хато қиладими ёки тўғри ўйнайдими, қўллаб-қувватлайди. Хато бўлади, такрорланади ҳам. Шундай вазиятда тушкунликка тушиб қолган футболчини фақат танбеҳлар билан койисанг, у майдонда эркин ҳаракат қилолмайди. Футболчининг айбини айтмоқчи бўлса, аввал уни мақта, кўнглини кўтар ва кейинроқ, мана бундай қилсанг, янада яхши бўлади деб ўргатсанг, у шу ишни қилади. Айниқса, бу ишни, жамоанинг катта мураббийи Аҳмаджон Мусаев жуда яхши уддалайди. Унинг гапларини баъзан эшитган сари янги нарса ўрганасан.

Захира ўриндиғида ҳам мураббийлар футболчиларни бекордан бекорга койиб ташламадилар. Уларга эркин ўйнаш ҳуқуқини бердилар. Албатта, ўйин схемаси тузилган ва ўшанинг асосида ўйнаш керак, бироқ футболчини ҳар бир қилган ҳаракати учун "турткилайвериш” унинг кутилмаган ҳаракатлар билан дарвозага зарба йўллаб, гол бўлишига ҳалақит беради. Аҳмаджон Мусаевнинг гапига мурожаат қиламан. "Футболчи мураббийнинг гапини эшитиб ўша ишни қилаверади, аммо, баъзан ўзи эркин ҳаракат ҳам қилади. Мураббий пас бер деганда у кутилмаганда дарвозага зарба йўллайди ва қарабсизки, гол! Таркибда ана шундай футболчилар ҳам бўлиши керак”.

Аввалига, чехлар ҳисобни очганида ҳафсала пир бўлганди, аммо йигитлар кучли ирода кўрсатишди. Мураббийларнинг кўрсатмасига кўра, чап қанотда орқага қайтиши керак бўлган Азизбек Муротов кутилмаганда дарвоза томон ерлатиб зарба йўллади. Бир қарашда фойдаси йўқдек ҳаракатга ўхшаб кўринган бу зарбани икки ҳимоячининг орқасидан чиқиб келган Тимур Ҳакимов "тутиб олди” ва совуққонлик билан дарвозага йўллади. Кийиниш хонасига кириб кетишдан олдин урилган бу гол йигитларнинг руҳини кўтарди. Ҳакимов ҳам голни нишонлаш учун реклама тахталаридан сакраб ўтиб мухлислар томон югурди. Аслида сариқ карточка кўрсатилиши керак бўлган бу вазиятда ямайкалик ҳакам карточкасини тополмадими, индамай қўя қолди. Ҳакимов карточка олганидами, Австралияга қарши ўйинни ўтказиб юборишга мажбур бўларди. Чунки, унинг битта сариқ карточкаси бор. Дарвоқе, карточкаси борлар сафига шу куни, жамоанинг ҳимоячиси Жавлон Мирабдуллаев ҳам қўшилди. Буёғига "сарғайиб” кетмаслик керак.

ЧЕХИЯ БИЛАН ЎЙИН: 15 ДАҚИҚАЛИК ТАНАФФУС ВАҚТИ
Ўзбекистон ўсмирлари Ҳакимовнинг голидан кейин ҳисобни тенглаштириб, кийиниш хонасига ҳотиржам йўл олишди. Уларнинг кайфиятлари бироз кўтарилган, аммо буни кўрсатмасликка ҳаракат қилишарди. Алексей Евстафеев ҳам кийиниш хонасида футболчиларга қарата, 1:1 ҳеч нарсани англатмаслигини айтиб, гол уриш кераклиги ҳақида жуда кўп гапирарди.
"Йигитлар, гол уриш керак! 1:1 бу ўйин энди бошланди деганидир. Агар камида 2 та гол урмасак, биз ўйиндаги имкониятларимизни сақлаб қололмаймиз. Барчаси бекор кетади”, - дея таъкидлади Евстафеев.

Йигитлар бироз нафасларини ростлаб олишди. Мураббийлардан қўшимча кўрсатмалар олишди. Диққатларини бир ерга тўплаб, яхшилаб ўйлаб олдилар. Чиқиб кетишаётганида шахсан менга ҳам ўрнак бўладиган ўша машхур шиорни айтиб, майдонга йўл олишди: "Ота учун, она учун, ватан учун, дўст учун, ҳамма учун!”

ЧЕХИЯ БИЛАН ЎЙИН: 2 БЎЛИМ
Иккинчи бўлимда дарвозалар алмашади, буни биласиз. Биринчи бўлимда Азизбек Муротов ҳукмронлик қилган чап қанотдан уюштирилган ҳужумларни нисбатан яхшироқ кузатиш имкониятига эга бўлган бўлсак, иккинчи бўлимда, Холмурод Холмуродовнинг қаноти диққат марказимизда бўлди. Албатта, бу иккин вингер ўйин давомида рақибни чалғитиш учун ёки вазият тақозо этганлиги боис қанотларда алмашиб ўйнашади. Масалан, иккинчи голга ассистентлик қилган Давлатбек Ёрбеков Холмуродовнинг ўрнига майдонга тушган бўлсада, Муротовнинг қанотида ўйнади.

Иккинчи бўлим яна Ўзбекистон терма жамоасининг устунлиги ва ташаббуси остида ташкил этилган ҳужумлар билан бошланди. Бир вақтлар жисмоний тарбия ўқитувчимиз бизни қўллаб-қувватлаш учун гапирганидек, "голнинг ҳиди келаётганди”. Кутилган гол ниҳоят дарвозага киритилди. Бунда иккинчи бўлимда майдонга тушиб, чап қанотда жуда яхши ўйин кўрсатган Давлатбек Ёрбековнинг ҳиссаси катта бўлди. У чехиялик гавдали-гавдали ҳимоячиларни бирин-кетин алдаб, жарим майдончаси ичига камалак шаклида тўпни етказиб берди. Ҳимоячилар бурнининг тагидан ўтиб кетган пас, шундоққина жамоа сардори Аббосбек Махсталиевнинг оёғига келиб тушди. У эса, имкониятни йўққа чиқармади. Совуққонлик билан дарвозабонни доғда қолдирди.

Голни нишонлашга чоғланаркан, Махсталиев уни табриклашга яқинлашаётган жамоадошларига қўли билан "кейин-кейин” дегандек бўлди ва жароҳат олган Равшанжон Ҳайдаровнинг олдига югурди. Яқинлашиб келгач, Ҳайдаровнинг гипс қилинган оёғидан ушлаб, бу гол ватан учун синган оёқларинг учун деб, ғалаба тўпини «Ўзбек Эвра»сига (Бу ўринда Патрис Эвра назарда тутилган — Uff.uz) бағишлади. Шуларни кўриб, ёшликка қайтиб, футбол билан шуғулланиб, мана шу йигитларнинг орасида бўлиб қолгим келди…

Иккинчи бўлимда Ўзбекистон терма жамоаси тўла устунликка эришди ва бунинг натижасида бутун стадионни ўзига ром этиб бўлган эди. Барча Ўзбекистонни қўллаб-қувватлар, хавфли вазиятларда гол бўлмаса афсусдан уa тортганликлари бемалол эшитилиб турарди.

Захира ўриндиғидагилар учун вақт жуда секин ўтарди. Устунлик биз томонда бўлишига қарамай, бир неча вазиятларда футболчилар голли вазиятларни йўққа чиқариб, мураббийлар штаби аъзоларининг асабларини синовдан ўтказишди. Айниқса, ўйиннинг сўнгги дақиқасида Ўзбекистон терма жамоаси дарвозаси томон йўлланган зарба ҳамманинг ҳавотирига сабаб бўлди. Ўйин давомида шунча қулай вазиятларга эга бўлиб, якунда ғалабани қўлдан бой бериш жуда-жуда ачинарли хол бўларди.

Ҳимоячиларга қийин бўлди. Биринчидан, ўнг қанот ҳимоячиси Равшанжон Ҳайдаров жароҳат олиб сафдан чиққан. Шунга қарамай, Ҳайдаров жароҳат олган футболчи сифатида ўйин қайдномасига киритилган ва мазкур футболчи ўйин давомида захира ўриндиғида учрашувни бевосита кузатиб борди.
"Ҳужумчиларимизда бир нечта вазият бўлди, улар ўша вазиятларнинг бирида гол уришганида маза қилиб, чўчимасдан ўйнардик”, - дейди Асилжон Мансуров. "Сўнгги дақиқаларгача ҳадик билан ўйнашга мажбур бўлдик, чунки 2:1 ҳисоби жудаям хавфли натижа”.

"Ҳимояда бугун жуда қаттиқ ўйин бўлди”, - дейди Сардор Раҳмонов. "Пенальти менинг тўпни қўлим билан ўйнаганим туфайли белгиланди. Ана шу айбимни ювиш учун ўйин давомида тинмай уёқдан-буёққа югурдим. Жуда чарчаганлигимни энди сезаяпман”, - дейди Раҳмонов эртасига.
Учрашув тугаб бораркан, орзуларнинг амалга ошаётганини тобора ҳис қила бошладим. Гуруҳдан биринчи ўрин билан чиқаётганимизни ҳам билардим. Захира ўриндиғи орқасидаги трибунада ўтирган Кристофер Поллет, бизнинг жамоамиздаги "янги ўзбек”, АҚШ – Янги Зеландия учрашувида ҳисоб очилмаётганини етказиб турганди. Ўзбекистон футболидаги янги тарих саҳифалари очилаётганини гувоҳи бўлаётгандим.

ЧЕХИЯ-ЎЗБЕКИСТОН 1-2. ЎЙИНДАН СЎНГ…
Майдонда нима бўлганbни, аввал веб-саҳифада чоп этилган видеолавҳамизда ўзингиз кўриб, бўлиб ўтган воқеаларга гувоҳ бўлдингиз. Бутун стадион Ўзбекистонни қўллаб-қувватларди. Футболчилар Ўзбекистон байроғини елкаларига осган ҳолда турли ҳил ёшдаги футбол ишқибозларининг олдига бориб бундай қўллаб-қувватлаш учун ўз миннатдорчиликларини изҳор қилиб, улар майдонда, ишқибозлар трибуналарда ўзбекча рақсга тушдилар.

Торреоннинг эрка болакайига айланиб қолган Тимур Ҳакимовни эса, ёш қизлар ва футбол ишқибозлари ҳадеганда қўйиб юбормасдилар. У билан суратга тушадиганлар минглаб топиларди, аммо ФИФА хавфсизлик офицери бизни майдондан тезроқ чиқиб кетишимизга ундарди.
Кийиниш хонасида эса, "Ҳеч кимга бермаймиз сени, Ўзбекистон” номли машхур хонанданинг қўшиғи баралла куйланарди. Бош мураббий Алексей Евтафеев ҳам болаларга миннатдорчилик билдириб, "отангизга, онангизга раҳмат” деб айтди. Шу сатрларни ўқиётган футболчиларимизнинг ота-оналари! Айтингчи, ота-она учун шундан ҳам ёқимлироқ сўз бормикан?

ЧЕХИЯ-ЎЗБЕКИСТОН. ЎЙИНДАН БИР КУН КЕЙИН
Чехияга қарши тарихий ғалабадан сўнг, футболчиларга 1 кун дам олиш куни берилди. Улар истаган вақтларида ухладилар, дам олдилар ёки кино кўрдилар. Ҳоҳлаган вақтларида эса, жамоадошларининг хоналарига кириб ўзаро суҳбат қурдилар. Улар тушликкача вақтни чоғ ўтказгунча терма жамоа делегация ва мураббийлар штаби футболчиларга палов тайёрлаб бердилар. Мексикада қозон, капкир, сариқ сабзи, қўй гўшти қаёқда дейсиз. Мексикалик Кристофер Поллет дунёда сариқ сабзи борлигини ҳам билмас экан. Начора, бор ресурслардан фойдаландик.

Сабзи арчилди. Тўграш бошланди. Аввалига, Асқар Толибжонов, Муродбек Исмоилов ва Рустам Меҳмоновлар ошнинг асосий масаллиғи бўлган сабзини ўзлари тўғрашди. Сал кейин, меҳмонхона ошпази ҳам тўғрашни бошлади. Аввалига йирик тўғраган бўлсада, "бир қулоғи тортилгандан” ҳар қандай тўйни гуллатадиган қилиб тўғрашни бошлади. Биз эса маза қилиб томоша қилдик. Таомни Абдулла Ачилов ҳамда Муродбек Исмоиловлар тайёрлашди. Ҳудди машхур телеканалдаги ош мусобақасига ўхшаб. Бир қозонда бошқа ошпаз, иккинчисида эса бошқаси. Жами 6 килограм ош дамланди.

Қозон очилганда мен ҳам маҳалламга бориб келгандек бўлдим. Камига ўзбекча шакароб, маҳаллий тилда "аччиқ-чучук” салати ҳам тайёрланди. Футболчилар тўйиб-тўйиб овқатланишди. Ош кўп, уни еганга раҳмат деб, Мексикада бизни оғиримизни енгил, мушкулимизни осон қилган дўстларимизга ҳам ош едирдик. Шу тариқа ўзбек маданияти Мексикага «экспорт қилинди».
Куннинг иккинчи ярмида футболчилар Торреон марказидаги Галериас кўнгилочар марказига бориб айланишди. Кимдир ўзига бутса, яна кимдир эса майка ва футболка, совға-саломлар харид қилди. Бироз, футболни эсдан чиқариб, одатий ҳаётга қайтгандек бўлишди. Сайрдан қайтиб футболчилар, таом тановвул қилиб, навбатдаги кунга тайёргарлик кўришди.

АВСТРАЛИЯГА ҚАРШИ ЎЙИН ОЛДИДАН…
Ўзбекистон терма жамоаси нимчорак финалдаги рақибини узоқ кутди. Алексей Евстафеев жамоасига Кот-Д‘Ивуар, Австралия ва Дания терма жамоалари рақиблик қилиши мумкин эди. Барча масала, Пачукада бўлиб ўтган Австралия-Дания учрашувида ҳал бўлиши керак эди.

Таомланиш учун 8-қаватдан 2-қаватга тушар эканман, телевизордаги стадионнинг панорама кўринишидаги видеосига кўзим тушди. Негадир, стадион бўм-бўш, тинмай ёмғир ёғарди. Шарҳловчининг испан тилидаги гапини ўз вақтида хонага кириб келган Кристофер Поллет таржима қилиб берди. Ўйин кучли ёмғир туфайли тўхтатилди ва жамоаларнинг ўйини бир кунга кечиктирилди.

Куннинг эртасига Ўзбекистон терма жамоаси аъзолари ҳам томоша қилган ўйинда Дания ғалабани бой берди ва Австралия терма жамоаси Ўзбекистонга рақиблик қиладиган бўлди. Мазкур учрашувдан сўнг, Австралия Торреонга режадагидан 1 кун кейин етиб келди. Австралия Футбол Федерацияси юзага келган вазиятни рўкач қилиб, ФИФАга ўйиннинг бир кун кечиктиришга, яъни 30 июнга кўчирилишини сўраб мурожаат қилди. ФИФА бу борада Ўзбекистоннинг позициясини сўради. Ўзбекистон Австралияни тўғри тушунди, аммо бу ҳам футболнинг бир қисми. Ўзбекистон ўйиннинг маълум бир муддатга кечиктирилишига рози бўлди. Бош мураббий Алексей Евстафеев: "Биз розимиз, фақат ўйиннинг 3 соат кечиктирилишига, яъни 29 июн куни 15:00 да эмас, балки 18:00 да!” Сал ўтиб, ФИФА ўйин вақти ўзгармаганлиги ҳақидаги расмий мактубни юборди. Учрашув 29 июн куни, терма жамоанинг 9-рақамли вингери Холмурод Холмуродовнинг туғилган кунида майдонга тушади. Австралияга қарши ўйинга тайёргарлик режадагидек кечди. Футболчилар мураббийларнинг кўрсатмалари асосида қоқ тушлик вақтида иқлимнинг иссиқликлари бардош бериш учун тер тўкиб машқлар қилишди.

Таъкидлаш керакки, Австралияга қарши учрашув Жаҳон чемпионатининг Торреондаги сўнгги ўйини ҳисобланади. Ўзбекистон терма жамоаси, Худо хоҳласа, ғалаба қозонадиган бўлса, Торреондан автобусда 4 соатлик йўл нарида жойлашган Монтеррейга йўл олади. У ерда Евстафеев жамоаси Конго-Уругвай жуфтлиги ғолиби билан беллашиши мумкин. Буларнинг ҳаммаси, Австралияни ютган тақдиримизда, худди буни Тошкентда уддалаганимиз каби...

СЎНГСЎЗ ЎРНИДА

«Кровне Плаза» меҳмохонасининг автомобиллар тўхташ жойида Ўзбекистонда ишлаб чиқариладиган «Sark» автомобилини кўриб, юрагим жизиллаб кетди. Тошкентда бу автомобил ҳаётнинг бир қисми сифатида эътиборни у қадар тортмасада, бу ерда у менга қадрдонимдек кўринди. Ёнига бордим, секин. Бизнинг жамоага бириктириб қўйилган ва Ўзбекистонда тобора ном қозонаётган Кристофер Поллетга фотоаппаратни тутқаздим. "Ол расмга, Крис!” дедим. У менга қараб, "бундан ҳам чиройли машиналар бор, ўшани олдида тушмайсанми расмга” деб сўради. Мен эса, жавоб бердим: "Қолган машиналаринг чет эллик, бу автомобил эса – ўзбек!”.

Санжарбек РИЗАЕВ
ЎФФ МАТБУОТ КОТИБИ
ТОРРЕОН, МЕКСИКА

Манба: www.the-uff.com

Ғолиблар!

IBRAT_KING — Tue, 28 Jun 2011 17:28:10 GMT

Кичик ёшдаги терма жамоаларимиз муваффақият қозонганда, ёзадиган одатий гапларимиз бор. Масалан, нега шу ёшларимиз катта бўлишса кучсизланиб қолишади? Ёки миллий чемпионатимизнинг савияси паст, шунинг учун болаларимизни асрай олмаяпмиз. Хм.. Яна нимайди? Хуллас шунақа гаплар. Лекин мен бугун бу ҳақида ёзиш ниятида эмасман. Зерикдим. Эътиборимни бошқа бир вазият тортди. Йўқ, мадҳияни баралла айтишгани эмас. Нима бўпти? Ёдлаб олса бўлади. Йўқ, футболчиларимиз учун қандайдир бегона туюлган иродали ғалабанинг қаердан келгани ҳақида, бошқалар гапирсин. Ғарбнинг мафкураси қандай ғоя асосига қурилган, биласизми? Қаҳрамонлик! Голливуд фильмларини кўринг. Қаҳрамон қаршисида пайдо бўлган қийинчиликларни мардонавор енгиб ўтади ва маррага етиб келади. Китобларини ўқинг. Камбағаллар кварталида туғилиб, туфли тозалаб, майда-чуйда сотиб катта бўлган етимнинг ишбилармон миллиардерга айланиб қолиши хикояси. Эсладингиз-а? Инсон тақдири фақат ва фақат ўзигагина боғлиқ экани ҳақидаги сафсатани исботловчи юзта воқеа! Манави ва анови ишларни кўрсатилгандек амалга оширасиз ва сиз ғолибсиз! Лекин атрофда буни амалга ошира олмаган миллионлаб омадсиз ҳақида лом мим йўқ. Омадсизми улар? Бир неча йил олдин АҚШ да югуриш бўйича мусобақа ўтказилди. Қандайдир хайрия тадбири эди. Турли мамлакатлардан ташриф буюрган ўн икки хаваскор яқин масофага пойгада иштирок этдилар. Масофанинг ярмига келганда, пойгачилардан бири кутилмаганда қоқилиб тушади. Қаттиқ йиқилади. Эхтиётсизликдир сабаби. Хуллас омадсизлик. Пойга давом этяпти ахир. Қолган ўн бир қатнашчи ҳам бор-ку, тўғрими? Аммо сафнинг энг олдида бораётган бир қиз ортга қайтади, йиқилган йигитни қўлидан тутади. Турғазишга ҳаракат қилади.

Томошабин хайрон. Йигит оёғини ерга боса олмасди. Икки қадам қўйиб, яна ўтириб олади. Кейинги иштирокчи ҳам келиб, йигитнинг елкасидан тутади. Учинчиси олдинга етаклай бошлайди. Томошабин хайрон. Нима бўляпти? Қаҳрамонлик ғояси қаерда қолди?

Ўн бир иштирокчи шикастланган ўн иккинчи шеригини (шерикмиди улар?) етаклаганча, манзил томон кетаётганди. Кимнинг ғолиб бўлиши ҳақидаги асосий савол ўртадан кўтарилди. Ҳар йили янгиланадиган турнир рекорди бу сафар собит қолиши ҳақида ҳеч ким ўйламасди. Уларни манзилдан қандайдир масофа ва вақт ажраб турарди холос. Шуниси аниқки, ўша вақт албатта ўтади, пойгачилар манзилга етиб келадилар. Биргаликда! Ҳаммаси! Томошабинга қизиқми? Қизиқ экан! Негадир деярли ҳамма ўрнидан туриб олган, гуруҳнинг манзилга етиб олишини кутишарди. Аслида нима мақсадда йиғилганлари, аммо бутунлай бошқа манзаранинг гувоҳи бўлаётганликлари энди уларни мутлақо қизиқтирмас, жараённинг ўзи барчага завқ бағишларди!

Ёшлар бир амаллаб манзилга етиб келишди. Ҳеч ким секундомерга қарамади. Ҳеч ким қаҳрамон бўлмади. Омадсиз йўқ! Мағлуб йўқ! Қаҳрамон йўқ! Лекин барча тўхтовсиз уларни олқишларди. Ғолиблар! Ўша куни мана шу атама урфга кирди. Бутун умри давомида ўша қаҳрамонлик мафкураси таъсирида улғайган инсон ўзини ўзи кашф қилди. Аслида инсонга нима кераклигини тўлиқ англаб етди. Рақобат деганда ривожланишнинг олий тафаккурини тушунадиган халқ ана энди, муваффақият калити аслида бутунлай бошқа ғорда яширинганини тушунди.

Кеча Аббос жуда чиройли гол киритди. Муҳим гол. Бу гол унда жуда катта эмоцияни уйғотганлиги аниқ. Лекин у чалғимади. Голни нишонлаш учун югура бошлади. Йўқ. Мухлислар томонга бормади. Шерикларидан кимдир уни қучоқлаш учун йўлини кесди. Қоч деган ишорани қилган Аббос захира ўриндиғи томон йўналишини давом эттирди. Евстафеев! Адашибман. Балки хаяжонлангандирман. Лекин Аббос хаяжонни жиловлаганди. Ие, кимдир турди ўрнидан. Кечаги турда жароҳат олиб, оёғини гипс қилдирган, айтишларича, ўн хафтага сафдан чиққан Равшанку! Бир оёқда сакраб-сакраб у ҳам Аббосга пешвоз чиқа бошлади. Сардоримиз ўзининг балки бугунгача киритган энг муҳим голини бирга нишонлаш учун Равшанни танлаганди. Йиғлаб юбормадингизми? Нега бизни доим Абидаллар йиғлатиши керак?

Саломат бўлинг!

Испан футболи афсонаси

IBRAT_KING — Mon, 27 Jun 2011 16:33:20 GMT

Аслида, у ҳақида мақола ёзиш фикри менда бироз аввал туғилган эди. Сайтга (uff.uz) Рауль билан боғлиқ хабар қўйилгач, бир мухлис томонидан қолдирилган "коммент” эътиборимни тортди: "Агар Рауль бўлмаганда эди, эҳтимолки, мен футболга қизиқмаган бўлардим”! Ҳа, айнан шундай ёзилган!

Болалик…
Раулнинг отаси ҳам футбол ишқибози бўлган. У "Атлетико”га мухлислик қиларди. Шунинг учун ҳам ўғлини ана шу жамоага олиб келади. 1992-йилда молиявий муамммолар туфайли футбол мактаби ёпилса-да, Рауль кўчада қолиб кетмади. Кўп ўтмай у "Реал”нинг футбол мактабига қабул қилинди. У ўшанда ўн беш ёшда эди.

Раулнинг "Қироллик клуб”идаги дебют учрашуви ўзини кўп куттирмади. Ўша йилнинг кузида аниқроғи, 19-сентябрда "Реал” ва "Алкала” клублари ёшлари ўртасида беллашув бўлиб ўтди. Учрашувда "Реал” тарбияланувчилари 5:0 ҳисобида ғалаба қозонишди, голларнинг бири эса Рауль ҳисобига ёзилди. У аста-секинлик билан Мадрид жамоасининг ажралмас бўлагига айланиб борарди. "Қироллик клуб”ининг ёшлар мураббийи Антонио Куирога шундай деганди: "У биринчи кундан-оқ жамоада ўрнини топди ва етакчиликни ўзи қўлига олди. Ўн беш яшар болакай бошқалардан яққол ажралиб турарди, мен қаршимда бўлажак даҳо турганлигини ҳис этардим.

Рауль ўз устида тинмсиз ишларди. У бошқа жамоадошларидан кўп жиҳатдан устун эди: ҳеч қачон ўзини баланд тутмас, бошқаларга ҳамиша ҳурмат билан муносабатда бўларди. Рауль футбол ўйнаш учун яралган, у менга ёқади ва ҳар доим шундай бўлиб қолади”.

"Реал”даги юлдузли онлар
"Қаймоқранглилар”нинг асосий таркибида майдонга тушиш унга ўн етти ёшида насиб қилди. Бу воқеа 1994 йилнинг 29-октябрида содир бўлган эдди. "Сарагоса”га қарши қийин кечган учрашувда "Реал” мағлубиятга учради. Аммо Рауль бу ўйиндан унутилмас ва ажойиб тассуротлар олди.
Кейинчалик, тезкор ва иқтидорли форвард "Реал”нинг асосий ўйинчисига айланди. Жамоада Зидан, Фигу, Роналдо, Бекхэм сингари футбол афсунгарлари бўлишига қарамай, улар орасида йўқолиб қолмади. Аксинча, барибир, энг муҳим голларни у урарди. Энг қийин паллаларда айнан Рауль жамоанинг жонига оро кирарди. У тўпни дарвозабон устидан ошириб тўрга ташлаб қўйишга жуда уста эди. Унинг шундай кўринишдаги голлари шу қадар машҳур бўлиб кетган эдики, айнан шу услуб "Рауль услуби”дея эътироф этиларди.

"Қироллик клуб”и таркибида Рауль олти бор Испания чемпионлигини қўлга киритди, уч марта Чемпионлар лигасида ғолиб чиқди. Бир марта Европа Суперкубогини боши узра баланд кўтарди, минтақалараро Кубокда зафар қучди. Европанинг энг кучли ҳужумчиси бўлди. Унинг "Реал” таркибидаги расмий учрашувларда киритган голлари сони 361 тани ташкил этади. Айнан шу натижа "Реал” тарихидаги энг юқори кўрсаткич ҳисобланади. Рауль шунингдек, бир неча марта Испания чемпионати ҳамда UEFA Чемпионлар лигасининг энг яхши тўпурари бўлди. "Don Balon” журнали танловига кўра, қаторасига беш йил Испанияда йил футболчиси деб топилди. 1999 йилда эса IFFHS уни жаҳоннинг энг яхши тўпурари деб эълон қилди.

Рауль узоқ вақт давомида "Реал”га сардорлик қилди. Жамоанинг энг содиқ, энг фидоий футболчиларидан бири эди у. Мухлислар баъзан ҳазиллашиб, жамоани "РеалМадрид” эмас, "РаулМадрид” деб аташарди. У клубнинг ҳақиқий рамзига, тирик афсонасига айланиб улгурган эди. Бутун жамоа танқид остига олинса ҳам Рауль бундан четда қоларди. Чунки ҳамма яхши билардики, у ўйинда борини берарди, бутун вужуди билан ғалаба қозонишга ҳаракат қиларди. У ўз фаолиятини "Реал”да тугатишни орзу қилганди, бироқ тақдир чархпалаги бутунлай бошқа томонга қараб айланди...

Испания терма жамоаси таркибида....
Рауль Гонсалес терма жамоа таркибига 1996 йилда қўшилган. У Европа чемпионатига олиб кетилади, бироқ мураббийлар уни ҳали жуда ёш деб ҳисоблаб, майдонга туширишмайди. Орадан икки йил ўтиб, Францияда ўтган жаҳон чемпионатида эса у асосий ўйинчига айланганди бироқ жамоа ҳаттоки, гуруҳ босқичидан ҳам ўта олмайди. Дарвозабон Субисареттанинг жуда қўпол хатоси туфайли Нигерияга 2:3 ҳисобида ютқизиб қўйишади. Болгария устидан қозонилган 6:1 ҳисобидаги йирик ғалаба ҳам уларнинг кейинги босқичга чиқишига ёрдам бера олмайди.

2000 йилги Европа чемпионатида эса улар мусобақанинг чорак финалига қадар етиб келишади. Бу учрашув барча футбол мухлисларининг ёдидан чиқмаган бўлса керак. Улар бу босқичда мусобақа мезбонларига рўбарў келишади. Ўйиннинг сўнгги дақиқаларида французлар дарвозаси томон пенальти белгиланади. Бу пайтда 2:1 ҳисобида Франция олдинда бораётган эди. Ўн бир метрлик нуқтага яқинлашган Рауль пенальтини голга айлантира олмайди. Унинг тепган тўпи дарвозанинг юқорисидан ўтиб кетади ва испанлар ортга қайтишга мажбур бўлишади. "Мен майдонда йиғладим. Кейин ечиниш хонасида ҳам, меҳмонхонада ҳам ўзимни ҳеч тинчлантиролмас эдим, - эслайди Рауль кейинчалик, - Худди бутун дунё менинг устимдан кулаётгандек эди. Ватанимга қайтгач, ҳеч кимни кўргим келмасди, ҳаттоки, ўз уйимдан ҳам қочиб кетгим келарди”.

Рауль Гонсалес кейинчалик, Испания терма жамоаси таркибида ажойиб ўйинлар кўрсатди. У терма жамоа таркибида 102та учрашувда майдонга тушиб, 44 марта рақиб жамоа посбонларини ранжитишга муваффақ бўлди. Унинг бу ёрқин натижасини фақатгина "Барселона” ҳужумчиси Давид Вилья янгилай олди, холос. Аммо янги порлаб чиқаётган юлдузлар эвазига Рауль учун терма жамоа таркибидан жой топилиши қийин бўлиб қолди. У жамоада ўйнаш истагида эканлигини бот-бот такрорларди, испанлар Европа ва Жаҳон чемпиони бўлишди, аммо уни қизил либосда бошқа кўрмадик...

Раулнинг иккинчи ёшлиги
Ўтган йилнинг ёзида ниҳоят ўша трансфер амалга ошди. Жамоага Бензема ва Роналду келгач, у бутунлай заҳира ўйинчисига айланиб қолган эди. Жозе Моуриньо клуб бошқарувига келгач, у билан очиқчасига гаплашди ва кетишга қарор қилди. Раулни ўз жамоаси сафида кўришни ҳоҳлайдиганлар кўп эди, бироқ энг яхши таклиф "Шалке-04”дан тушди ва у буни қабул қилди. Чунки уни қизиқтирган энг муҳим жиҳат - "Шалке”нинг Чемпионлар лигасида иштирок этиши эди.

Германияда Рауль ўзининг иккинчи ёшлигини ўтказмоқда, деб бемалол айтиш мумкин. У гельзеркинхенликлар сафида қирқдан ортиқ учрашувда майдонга тушиб, 20 га яқин гол киритишга улгурди. Шунинг баробарида ўзининг еврокубоклардаги голлари салмоғини янада ошириб олишга эришди.

Хулоса ўрнида...
Рауль ким ўзи? Оддий футболчими? Дунёда кучли футболчилар бисёр. Бироқ худди Раулдек барчанинг бирдек меҳрини қозона олган, футболни ҳақиқий санъат даражасига кўтара олган футболчилар кўп эмас. У ўзининг беқиёс истеъдоди, бетакрор ўйини ва жозибадор ҳаракатлари билан миллионлаб инсонлар меҳрини қозонган, қанчадан-қанча болалар қалбида футболга меҳр ва иштиёқ уйғотмаган дейсиз... Футболдан завқ олишга, уни севишга сабабчи бўлгани ҳам рост. Шундоқ экан, уни уни оддий футболчи деб аташ мумкинмиди? Асло. У буюк ўйинчи! Бунга шубҳа йўқ!

Аҳмад Юсупов

Манба: www.uff.uz

Бугун хўрозларга иш кўпаяди ёки «агар»лар...

IBRAT_KING — Sat, 25 Jun 2011 16:42:26 GMT

Бугун тонгда ҳар кунгидан ҳам кўпроқ хўрозлар қичқириғини эшитсак керак. Улар ҳам бизни ҳал қилувчи ўйинга уйғотиш учун бор овозлари билан қичқиришса керак.

Ўйлашимча, бугун футбол мухлислари хўрозларсиз ҳам барвақтдан, эрта саҳардан уйғониб, ВАТАНИМИЗ ЖАМОАСИга мухлислик қилишади, уларнинг ҳаққига дуолар ўқишади.

Ўсмирларимиз тўп сураётган «D» гуруҳи мусобақадаги энг чигал гуруҳ бўлиб турибди. 2 ўйин натижасига кўра барча жамоаларда бир хил очко ҳамда барчасида кейинги босқичга чиқишга тенг имконият мавжуд. Гапни қисқа қилиб, бугун қандай натижалар бизни қониқтиради ва биз Худо хоҳласа гуруҳдан чиқсак, кимлар билан тўқнаш келишимиз ҳақида икки оғиз гапириб ўтсам (менимча икки оғиздан кўпроқ бўлади-ёв).

ЎЗБЕКИСТОН

Исталган натижа кейинги босқичга олиб чиқиши мумкин, бироқ....

Ғалаба ва дуранг 100% кейинги босқични кафолатлайди, мағлубият бўлганда эса имкониятларимиз жуда-жуда-жуда кам!

Агар ғалаба қозонсак,(3-4 ўрин бўлмаймиз)
a) 1-ўринни оламиз, агар...
– Янги Зеландия ва АҚШ дуранг ўйнашса;
– Янги Зеландия ёки АҚШ ютган тақдирда эса, қачонки биз камида 5 та тўп фарқи билан ютсак.

b) 2-ўринни оламиз, агар…
– Нариги жуфтликда дуранг натижа қайд этилмаса ҳамда биз 5 та тўп фарқидан кўпроққа ютиб қўймасак.

Агар дуранг ўйнасак, (1, 4 ўрин бўлмаймиз)
a) 2-ўринни оламиз, агар нариги жуфтликда кимдир ғалаба қозонса.
b) 3-ўринни оламиз, агар нариги жуфтликда дуранг натижа бўлса.

Агар мағлубиятга учрасак, (1-2 ўрин бўлмаймиз)
a) 3-ўринни оламиз, агар биз гол уриб минимал ютқазсак(2-3, 3-4), нариги жуфтликда эса кимдир камида 5-0 ғалаба қозонса.
b) 4-ўринни оламиз, агар-магарсиз....

Сизда савол туғилиши мумкин, «Нега дуранг ўйнаб, 3-ўринни олсак, аниқ кейинги босқичга чиқамиз» деган. Сабаби кечаги «А» ва «Б» гуруҳдаги ўйин натижаларига кўра, КХДР ўз гуруҳида 2 очко билан 3-ўринни олди ва мусобақани тарк этишди. «Б» гуруҳида 3-ўринни олган Аргентина ҳисобида эса 3 очко мавжуд ва улардаги тўплар нисбати -4 ни (3/7) ташкил қилмоқда. Хуллас, ҳаммаси яхши бўлади!

Шу ўринда, сизга мусобақа регламентини ҳам илова қилиб келтирмоқчиман:

Регламентнинг 25-банди 5-қисми:
Жамоаларнинг гуруҳдаги ўринлари қуйидаги кўринишда аниқланади:
a) Барча ўйинлардаги очколар сонига кўра;
b) Барча ўйинлардаги тўплар нисбатига кўра;
c) Барча ўйинлардаги киритилган голлар сонига кўра.

Агар икки ёки ундан ортиқ жамоалар юқоридаги мезонлар бўйича бир хилда кўрсаткичга эга бўлса, унда жамоалар ўрни қуйидагича аниқланади:

d) Ўзаро ўйинлардаги очколар сонига кўра;
e) Ўзаро ўйинлардаги тўплар нисбатига кўра;
f) Ўзаро ўйинларда киритилган голлар сонига кўра.
g) ФИФА Ташкилий қўмитаси томонидан ташланадиган қуръа натижасига кўра.

Энди иккинчи масала, яъни агар биз гуруҳдан чиқсак кимларга тўқнаш келишимиз ҳақида озгина гаплашсак.

Агар, 1-ўринни олсак,
унда регламент бўйича «B», «E», «F» гуруҳларида 3-ўринни олган жамоалар билан ўйнаймиз. Булар қуйидаги жамоалар бўлиши мумкин:
«B» гуруҳдан: Аргентина
«Е» гуруҳдан: Эквадор / Панама / Буркина Фасо

Аммо ҳар қандай вазиятда ҳам «F» гуруҳдаги жамоаларга тушмаймиз. Сабаби жамоалар навбатига кўра танланади. Масалан, агар «B» гуруҳдан Аргентина чиқа олмаса, унда «Е» гуруҳдаги жамоа бизга тушади. Агар «B» ва «E» гуруҳларидаги 3-ўрин соҳиблари ҳам чиқа олмаган тақдирдагина бизга «F» гуруҳи тушар эди, лекин «А» гуруҳи 3-ўрин соҳиби аллақачон мусобақани тарк этгани туфайли, бундай бўлмайди.

Агар, 2-ўринни олсак,

унда «E» гуруҳи ғолиби билан ўйнаймиз. Бу эса Германия деганидир!

Агар, 3-ўринни олсак,

унда регламент бўйича ёки Мексика ёки Японияга тушамиз. Бунда қайси жамоага тушишимиз «С» гуруҳидаги 3-ўрин соҳибига боғлиқ. Агарда Канада ёки Руанда жамоалари «С» гуруҳида 3-ўрин билан Аргентинадан яхшироқ натижа кўрсатган ҳолда кейинги босқичга чиқишса, унда биз мусобақа мезбонлари Мексика жамоасига қарши тўп сурамиз. Агар «С» гуруҳидаги 3-ўрин соҳиби кейинги босқичга чиқа олмаса, унда биз қитъадошларимиз Япония билан куч синашамиз.

«Вой, энди нима бўларкин-а?» деб саволарга жавоб топа олмаётган мухлисларга бир машҳур мултфильмдаги иборани эслаб ўтмоқчи эдим:

«Эртага тонг отсин, ҳаммасини кўрасиз!»

Манба: www.uff.uz

Маҳаллий ишқибозлар «Ўзбекистон» номи туширилган либосларда

IBRAT_KING — Fri, 24 Jun 2011 16:27:44 GMT

Биз гуруҳдаги жуда муҳим ўйин олдида турибмиз. Жаҳон чемпионатидаги энг чигал вазият бу - "D" гуруҳида юзага келган. Эртага тўрт жамоа ҳам фақат ғалаба учун ўйнайди. Гуруҳдаги биринчи учрашувлардан сўнг ўзига келган Ўзбекистон ўсмирлари АҚШни малғубиятга учратди. Бутун дунё оммавий ахбоорт воситаларида бу кутилмаган натижа ўлароқ талқин қилинди. Гўёки бу "сюрприз" бўлганмиш. Бироқ ўйиндан кейинги матбуот анжуманида журналистларнинг "Айтингчи, ушбу ўйин барчамиз учун кутилмаган натижа билан якунланди, сизлар учун ҳам шундайми?”, - деб берган саволларига ич ичимдан Евстафеевни " Ҳа, ҳақиқатан ҳам "сюрприз" бўлди. Аммо бу "сюрприз" ўтган ўйинда Янги Зеландияга қарши учрашувда юз берган эди. Бугунги ўйинда эмас", - деб жавоб беришини ичи-ичимдан хоҳлаган эдим.

Чехлар учун ҳам биз учун ҳам шанба кунги ўйин жуда ҳам шиддатли ва тактик нуқтаи назардан жуда ҳам кескин бўлиб ўтиши кутилаяпти. Биринчи ўйинда АҚШ терма жамоасига омади чопмай ютқазиб қўйганини исботлашга ҳаракат қилган чехлар, ҳимояда анча фаол ўйнашди. Дарвозабоннинг бир неча бор қилган "сейви" эса бутун жамоанинг жонига оро кирди. Европа вакиллари ўйиндан ўйинга очилиб бормоқда. Мураббийнинг сўзларига қараганда, ҳозирда улар ўз имкониятларининг 80% даражасида ўйнашмоқда. Унинг устига футболчилари жисмоний жиҳатдан ҳам бизникидан анча бақувват. Учрашувда чехлар бизнинг ҳимояга кўпроқ босим ўтказади.

Агар чехлар устидан ғалаба қозонаман, деса унда мураббийлар штаби ҳимоядаги камчиликларга алоҳида эътибор беришлар лозим. Иккита ўйиндан сўнг таркибга мустаҳкам жойлашган Равшанжон Ҳайдаровнинг сафдан чиққанлиги, жамоа учун сезиларли йўқотиш бўлди. Евстафеев ва унинг жамоаси энди ҳимояда "рокировка" қилади. Темур билан Аббосга эса олдинда бир тўда бўлиб ҳимоя қиладиган чехларнинг қаршилиги енгишлари керак бўлади.

Ундан ташқари, футболчилар ўзаро тўп узатишлардан "браклар", тўпни бериш керак бўлган жойда дарвозага қараб ноаниқ тепишлар, тўпни ушлаш, алғов-далғов ҳаракатларни қўқотиш, керак бўлмаган жойда бошқа флангга кучли ва ноаниқ зарба беришни тўхтатишлари керак. Ғанишер ҳам ўз жарима майдонида кўпроқ ҳаракат қилиб, ўйинчиларга далда бўлса, улар ҳам янада бемалол ўйнар эди. Бугун сўнгги учрашувдан олдинги сўнгги машғулотлар бўлиб ўтади. Болаларни руҳан тайёрлашни уддалаган мураббийлар штабига алоҳида миннатдорчилик билдириш керак.

Балки, барча Евстафеевга жуда кўп эътибор қаратарку, назаримда ёрдамчи мураббий Аҳмаджон Мусаевнинг йигитлар билан ишлашда меҳнати катта. Айнан унинг кўрсатмалари остида жисмоний таёргарлик бўйича мураббий Муродбек Исмоилов тинмай меҳнат қилмоқда. Ҳар бир бола билан индивидуал суҳбат олиб бориб, ўзига бўлган ишончни кучайтириш бу жуда катта меҳнат талаб қилади. Бу эса, майдон ортида қолиб кетаётган, балки кўринмаётган, аммо ғалабамизнинг асосий омилларидан бири ҳисобланади.

Қувонарлиси шундаги Торреондаги стадионда майдон узра хилпираётган энг катта байроқ ҳам бизникидир. Телевизорда ўйинни томоша қилган мухлисларимиз, федерациямиз Ўзбекистондан бир гуруҳ мухлисларни Мексикага жўнатган, деган ўй пайдо бўлиши мумкин, аммо уларнинг барчаси маҳаллий ишқибозлардир. Бошига дўппини кийиб, юрагидан "Ўзбекистон" деган сўзни баланд овозда 90 дақиқа мобайнида айтганини кўриб, шахсан ўзимнинг этим жимирлаб кетди. Устига "Ўзбекистан" деб ёзилган футболкаларни кийиб майдонга келаётган бу фанатлар гуруҳи энг фаол ҳисобланади. Ҳатто ён қўшни АҚШ ҳам бундай ишқибозларга эга эмас. Буни кўрган америкалик ҳамкасбларимнинг ичидан нима ўтганини биламан. Шу жойда фахрланиб кетдим. Албатта фанатлар гуруҳини тузилишида терма жамоамиз матбуот котиби Санжар Ризаевнинг ҳиссаси катта. Санжар қуръа ташлаш маросмига келган вақтида делегациямизга ёрдам бераётган расмий вакил Кристофер Поет билан келишиб, унинг ёрдамида мана шундай фан клуб тузишга сабабчи бўлган. Ҳатто Чехия - Янги Зеландия учрашуви давомида ҳам ушбу ишқибозларнинг "Ўзбекистон", деган ҳайқириқлари одамни ҳайратга солар эди. Қойил!

Ният қиламизки, бизнинг ўзбек мухлисларимизнинг йўқлигини билдирмасликка ҳаракат қилаётган ушбу мексикаликларнинг шанба кунги қўллаб-қувватлашлари йигитларимиз учун жуда зарур. Ҳозир ҳар қанча гапирмайлик, ўйин тақдирини ўша "концентрация" ва ўша руҳий ҳолат ҳал қилади. Бу томондан ҳам иккала жамоа аъзолари ўйинга яхши кайфиятда тайёрланмоқда. Ғалабаларимизнинг кети узилмасин.

Санъат Шарипов, Торреон
Uff.uz сайти учун махсус тайёрланди