Мадриднинг "Реал” клуби ярим ҳимоячиси Кака жароҳатидан тузалиб, сафга қайтгандан сўнг Бильбаонинг "Атлетик” клубига қарши ўтказилган учрашувда асосий таркибда майдонга тушди ва иккита гол киритишга муваффақ бўлди. Табиийки, шундан сўнг журналистлар эътиборига тушган бразилиялик футболчи Испаниядаги бир қатор нашрларга интервью бериб ўтди. Уларда Кака ашаддий рақиблари бўлмиш "Барселона” клубига қарши ўтказиладиган класико баҳслари ҳақида ҳам сўзлади.
— Сиз учун "Сан Мамес” ўйингоҳида "Атлетик” дарвозасига киритилган иккита гол қандай аҳамиятга эга? — Жуда катта аҳамиятга эга. Улар менга ўз кучимга бўлган ишончни қайтариб бердилар.
— Ростан ҳам Мадриднинг "Реал” клуби сафидан кетишни режалаштириб турибсизми? — Узоқ вақт давомида жароҳатим туфайли майдонга туша олмай келдим. Менинг ўйнамаслигимга фақатгина шу нарса сабаб бўлган эди. Кўпчилик нимагадир бу ҳолатни жамоадан кетишни исташим билан боғлашга ҳаракат қилди. Шундай одамлар учун алоҳида таъкидлаб ўтишни истардим: мен "Реал” сафида улкан ғалабаларга эришмоқчиман.
— Трибуналардан эшитилаётган танқидлар сизни хафа қилмайдими? — Йўқ, мухлисларни жуда яхши тушунаман. Умид қиламанки, уларнинг ишончини оқлашга муваффақ бўламан. Фақатгина менга бироз вақт беришингизни сўрайман, холос.
— Келгуси турда "Реал” "Барселона”га қарши майдонга тушади. Учрашув қандай натижа билан якунланар экан? — Гарчанд охирги учрашувда каталонияликларнинг қўли 5:0 ҳисобида тугаган бўлса ҳам, "Барселона”ни мағлубиятга учрата оламиз. "Барселона”ни енгилмас жамоа деб ҳисобламайман. Биз Чемпионлар лигаси, Испания чемпионати ва Кубогида ғалаба қозона олишимизга ишонишда давом этишимиз керак.
— Моуриньо билан бўлган муносабатларингиз қандай шаклда бўлиб турибди? — Жуда ҳам ажойиб. Тўғри, шу вақтга қадар матбуотда бизнинг номларимиз кўпинча ёнма-ён тилга олинди ва асосан салбий маънодаги хабарлар берилди. Аммо буларнинг барчаси ёлғон эканини айтмоқчи эдим. Моуриньо билан ҳам, мураббийлар штабининг бошқа аъзолари билан ҳам яхши муносабатдаман. Менга кўрсатган ёрдамлари учун уларнинг барчасидан жуда ҳам миннатдорман.
— Қайси совринни қўлга киритишни кўпроқ истаган бўлардингиз — чемпионат, Кубок ёки Чемпионлар лигаси? — Мен уларнинг барчасини қўлга киритиш истагидаман.
