Мадриднинг "Реал" жамоаси бош мураббийи
Жозе Моуриньо, УЕФА томонидан еврокубоклардаги икки учрашувдан
четлатилганидан хурсанд эканини билдириб ўтди. У УЕФАнинг бу қарорини
ўзи учун мукофот деб билишини ҳам қистириб кетган.
"Ушбу жазо -
мен учун мукофотдек гап. Мен ҳеч қачон ўзимни ўзгартиришга уринмайман.
Бир вақтлар, болалик чоғларимда бувим менга: "Агарда сенга нисбатан
ғаразгўйлик қилаётган бўлсалар, сен хурсанд бўлишинг лозим,". - деган
эди.
Мен учун алоҳида, бошқа мураббийлар учун алоҳида
қонун-қоидаларнинг жорий этилганидан қувонаман. Мен учун бу тарихий
ҳолатдир. Мен белгиланган техник худуддан чиқишим мумкин эмас,
бошқаларга бўлаверади. Мен тўпни рақиб футболчисига бермасдан, олиб
қўйсам бўлмайди, бошқаларга бўлаверади. Мен заҳира ҳаками билан гаплаша
олмайман, бошқалар гаплашаверадилар. Ахир бу бахт-ку", - дейди
португалиялик мураббий ўз услубида.
Эслатиб ўтамиз,
португалиялик мураббий Чемпионлар лигасининг "Аякс"га қарши ўтказилган
учрашувидан сўнг ўзини яхши тутмагани учун жазоланган эди. Ушбу
учрашувда қизил карточка олган Серхио Рамос ва Хаби Алонсолар унинг
кўрсатмаси оқибатида бундай иш қилганлар деган қарор билан УЕФА шундай
жазо қўллашга қарор қилган.
Энди шу муносабат билан
португалиялик мураббий иккита учрашувни ўтказиб юборса, футболчилар
биттадан учрашувда майдонга туша олмайдилар.
