Бош мураббийимиз Вадим Абрамов мулоқот ҳудудида ўзбек журналистларга турнир якунлари бўйича ўз фикрларини билдириб ўтди.

- Мухлисларимизга алоҳида раҳмат айтмоқчиман, - дея гап бошлади у. - Бизни мусобақанинг бошидан охиригача қўллаб-қувватлаб туришгани учун ташаккур. Футболчиларимизга ҳам раҳматнома эълон қиламан. Улар ўз кучларига ишониб, турнирнинг шу жойигача етиб келишди. Терма жамоамизни порлоқ келажак кутиб туриганига ишончим комил.

- Сиз раҳбарлигингизда терма жамоа ўзгача ўйин кўрсатиб, мухлислар қалбини забт этди...
- Албатта, замонавий футболда тўпни кўпроқ назорат қилиб туриш ва қисқа тўп узатишлар муҳим аҳамият касб этиб бўлган. Мамлакатимиздаги майдонларнинг барчаси ҳам бундай ўйин кўрсатишга имкон бермайди. Бу ердаги майдонларни кўрдинглар, ҳаммаси жаҳон стардартлари бўйича, ўта сифатли барпо этилган. Бундай текис майдонда дарвозабондан тортиб, ҳужумчиларгача барча бирдек ҳаракатда бўлади. Ўзимизда эса ҳужумчиларнинг тўп билан югуришлари шарт эмас. Уларни ҳимоячилар юқорилатиб тўп билан таъминлашади-қўйишади.

- Турнирнинг савияси ҳақда нима дея оласиз? Осиё футболида ўсиш борми?
- Осиё чемпионати савияси ҳар томонлама ошган, деб ҳисоблайман. Шахсан ўзим чемпионатнинг бу  даражада ўтишини  кутмагандим. Терма жамоаларнинг савияси, ташкилотчилик бўйича катта ўсиш бор. Ишонч билан айтишим мумкинки, Ўзбекистон терма жамоаси Япония ва Жанубий Корея терма жамоалари савиясидан узоқда эмасмиз, уларга яқинмиз. Сизларга ваъда бериб ишонтираманки, Австралиянинг биздан кучли эмасликларини ҳали исботлаймиз.

- Араб жамоалари устидан ғалаба қозонишни уддалай бошладик, деб қўрқмай айтсак бўлаверадими?
- Мен бунгача ҳам айтганман, ҳозир ҳам айтаман: араб жамоаларига қарши ўйинларда Ўзбекистон ҳеч қачон қийналмаслиги керак. Бу жамоалардан биз бир бош устунмиз.

- Демак, ўзбек мухлисининг азалий орзуси – навбатдаги Жаҳон Чемпионати йўлланмасини қўлга киритишимиз мумкин?
- Терма жамоамиз жаҳон чемпионати йўлланмасини қўлга киритишга муносиб ва бунга қодир. Бизда истеъдодли футболчилар етарли. Шундайлардан биттаси Фаррух Нурлибоев. У яқин келажакда терма жамоамизнинг марказий ҳимоя чизиғида ўз ўрнига эга бўлади. Ростини тан оладиган бўлсам, уни Австралияга қарши баҳсда майдонга туширмоқчи эдим. Аммо атрофимдаги мутахассислар Фаррухнинг жуда ёшлиги, тажрибаси йўқлигини таъкидлашиб, фикримдан қайтаришди. Уларнинг гапига қулоқ солмаслигим керак экан...

Ибратбек Ибрагимов,
Доҳа